Yevropa Chempionlar ligasi yarim final bosqichida «Inter» bilan bo‘lib o‘tgan shiddatli uchrashuvda «Barselona» dramatik tarzda musobaqani tark etdi. Birinchi o‘yinda Italiyaning «Inter» klubiga qarshi 3:3 durang o‘ynagan kataloniyaliklar, javob bahsida qo‘shimcha vaqtda 3:4 hisobida imkoniyatni boy berdi.
O‘yindan keyin jamoaning yorqin iqtidorlaridan biri, 18 yoshli iste’dodli futbolchi Lamin Yamal muxlislarga murojaat qilib, ularga Chempionlar ligasi sovrinini kelajakda albatta qo‘lga kiritishga va’da berdi.
«Biz maydonda bor kuchimizni sarfladik, bor imkoniyatlarimizni ishga soldik. Afsuski, bu mavsum Chempionlar ligasida g‘alaba qozonish imkoni bo‘lmadi. Ammo biz bu bilan taslim bo‘lib qolmaymiz, biz qaytamiz va yana g‘olib bo‘lish uchun harakat qilamiz», — dedi Lamin Yamal.
Uning ta’kidlashicha, «Barselona» klubi o‘z tarixiga va nufuziga mos ravishda yana Yevropaning eng yuqori cho‘qqisiga qaytishi kerak:
«Kules (Barselona muxlislari), biz klubimizni o‘ziga munosib bo‘lgan joyga olib chiqamiz va eng yuqori darajadagi sovrinlarni qo‘lga kiritmaguncha to‘xtamaymiz. Bu mening sizlarga va’damdir va albatta uni amalga oshiraman. Chempionlar ligasidagi bu g‘alabani albatta shahrimizga olib kelamiz!»
Shu bilan birga, Yamal muxlislarni yakshanba kuni bo‘lib o‘tadigan Ispaniya chempionati (La Liga) doirasidagi «Real Madrid»ga qarshi klassik uchrashuvda birgalikda jamoani qo‘llab-quvvatlashga chaqirdi:
«Ha, bugun biz uchun og‘ir kun bo‘ldi. Lekin yakshanba kuni bizga yana bir muhim final kutmoqda – "El-Klasiko". Bu o‘yinda biz muxlislarimiz bilan birgalikda bo‘lib, g‘alabaga erishishimiz shart. Yashasin Barsa!» — deya o‘z murojaatini yakunladi Lamin.
Aytish joizki, yosh iqtidor egasi Lamin Yamal nafaqat Ispaniya, balki butun dunyoda, jumladan O‘zbekistonda ham ko‘plab muxlislarga ega. Uning bu so‘zlari dunyoning turli burchaklaridagi muxlislarda Chempionlar ligasi g‘alabasiga bo‘lgan ishonchni qayta uyg‘otishi shubhasiz.
O‘z navbatida, «Barselona»ning bu yilgi Chempionlar ligasidagi muvaffaqiyatsizligini Ispaniya, Italiya, Turkiya kabi mamlakatlar sport nashrlari ham keng muhokama qilmoqda. Kataloniyaliklarning keyingi mavsum uchun yangi rejalar, yangi o‘yinchilar bilan qaytishi haqida ko‘plab taxminlar ham paydo bo‘ldi.
Yamal kabi yosh iqtidorlarning bu kabi qat’iy va’dalari muxlislarda yangi umidlarni uyg‘otmoqda. Hozircha «Barselona» Chempionlar ligasi bilan xayrlashdi, ammo klubning buyuk tarixidagi yangi sahifa hali oldinda. Lamin Yamal esa o‘sha tarixni yozishda muhim figuralardan biri bo‘lishi mumkin.
Lamin Yamal, Barselona, Inter, Ispaniya, O‘zbekiston
